عبدالرحمن بامەرنی
پێناسا گیروبونێ لدەف عاشقان، لاوازبونا دلی یە و لبەر میزەخێن پانزینخانا، پاقژكرنا دەشبولێ سیارێ یە و ل بەر دەروكێ دائیرا رەگەزنامێ، هەلسەنگاندنا كاروبارێن حكومەتێ یە و درێڤەبەرییا هاتن و چوونێ ڤە ژی، سەرەدانا هەمی ژوورێن وێ رێڤەبەریێ یە و هژمارتنا خێت و نەجمە و تەیركێن ل سەر ملێن پولیسان!.. دگەل گیروبونێ ئەم دەفتەرا بیرهاتنان دكێشینە بەر سینگا خوە و ئەو هەمی تشتێن دسەر مروڤی را بورین، ئەو تشتێن ژ دەستێ مروڤی چووین یان ئەو تشتێن بو مروڤی هێشتا جهێ گومانێ یان مروڤ نەشیایی تا نوكە چ بەرسڤان بو بدانیت، كت كتە دهێنە بەرچاڤێن مروڤی!. براستی یێ پشتی سەرهلدانێ د بویەران ژی را بوری بیت، ب سەدان لاپەر، دسەرێ وی دا هەنە و هەمییان ژی نیشانا پرسێ و گومانێ یێن ل بەر هەین.
سەرەرایی كو ژیانا مە هەمی ل سەر نازكیێ و چێبونێ و خو گوهرینێ و باشتربونێ راوەستیایە، بەلێ ناهێتە ڤەشارتن كو نە ئارامییا ژ ئەنجامێ وان هەمی بویەران، ئەم یێن فێربوینە روتینا روژانە و چ تشتەكێ رویبدەت بو مە نە خەمە و ئەز پێ نە حەسیایمە ژی ،ئەگەر ئێكی روژەكێ خوە ژ گیروبونێ یان روتینا روژانە (عاجز) كر بیت، خو ئەگەر بهایێ ئێك لیترا پانزینێ چەند فرتك بچنە سەر و بئێك دەفعە، ژ پێنج سەدا خوە ل هزار دیناران بدەت یان كارەب حەفتیەكێ ژ تاخەكی بهێتە برین یان هەر پولەكا قوتابخانێ زێدەتر ژ 50 قوتابیان تێڤە هەبن و ئەگەر بێژنە مروڤی بهایێ پلێتا دختوری یێ ژ دەهـ هزار دیناران بویە 15 هزار دینار. روتینا روژانە هەمی تشت یێ لبەر مە بەرزەكرین و ئەم نەشیاینە بو خو خوشیێ ژ بێهنەكا ژیانا خوە وەربگرین، تا ئەو تەلەفزیونێن دخانیێن مە ژی ڤە، ژ ئێكا رەش و سپییا عادی و مە هەرو زارویەك فرێدكرە سەر بانی بو زڤراندنا ئەریەلی، نوكە یێن بوینە پلازما و دیجیتال و هند كەنالێن عەسمانی یێن دبن خزمەتا كونترولێ ددەستێ مە دا زێدەبوین، كو ئەم نەشێین خوشیێ ژ ئێك بەرنامە یان گوهدانا سترانەكێ یان بەرێخودانا فلمەكی وەربگرین، ئها روتینا مە ژی ئێك ژوان كەنالێن عەسمانی یە، ئەڤرو (تەرەدود)ەكە و تە هندە دیت تەرەدودا وی كەنالی هاتە گوهرین و ئە و كەنالێ ئەم ب سەر سەلیقەییا وێ هەلبوین، مە ژبیر كر و ئەم ل كەنالەكێ دی یێ عەسمانی كەهی بوین و یێ دی ژبیرا مە چوو و هەما ئەو یا مای، ناڤێن مە ژی ببنە (تەرەدود) و روژەكێ ئەم ژی، دگەل گوهرینا وێ بهێینە ژبیركرن یان لادان ژ جهێ خوە و شوینا كێلییا شەدای و فیرعینی، خوە ل جاددێن ئەوروپا ببینین. ژیان ژی هەر هوسایە، روژ دهێن و هەیڤ دهێن و سال ژ عەمرێ مە دچن، لێ یا نە هوسا ئەم دعەمرێ خوە نەگەهین و ئەم نەزانین ئەم ل چ دگەرین یان مە چ دڤێت.
%20copy.jpg)
ليست هناك تعليقات:
إرسال تعليق