تشتێ ژ هەمیا پتر دژیانا خوە دا من حەژێكری و من گەلەك خەون پێڤە دیتین، (دوو دەرهەم)ەكێ پێكڤە بو، دەما من قەستا مال دكر، من برێكێ ڤە دیتبو! باش لبیرا منە كوژیەكێ وی بتنێ دیار دكر و یێدی دناڤ تەقنێ دا بەرزە ببو، من خوە دسەر را گاڤ دا بو و بەری چاڤێ من ژێ خافل ببیت، ئەز پاش پاشكی زڤریم و بێی لدوور خوە سەحبكەم، من دەستێ خوە دایێ و دناڤ پەحنكا دەستێ خوە دا پەرخاند و من حشك را حەشاندە دبەریكا خو دا،
ئەز لهەوە ناڤەشێرم تا ئەز گەهشتیمە مال، من 6 جاران ژ بەریكا خو ئینا بو دەر و من دئینا پێش چاڤێن خو و من دناڤ دەستێ خوە دا دگڤاشت و جارەكا دی من دزڤراندە دبەریكا خوە دا ڤە. ڤی دوودەرهەمێ پێكڤە، گەلەك خەون دسەرێ من دا دروست دكرن و ئەگەر بەهرەمەندیەك ئەڤرو لدەف من هەبیت، نیڤەك ل سەر خاترا وی یە، ئەگەر ئەز یێ شاش نەبم بو ماوێ پێنج روژان بو، ئەو دوو دەرهەم ژ دەستێ من دچوو دبەریكا من دا و دهاتە ددەستێ من دا ڤە، جارنا من تەبەل یێن پێ دكرین، تایرە بو ترومبێلكا تێلەی، كوك، كێك، شەكروك، دناڤ بچیكان ژی دا من گەلەك یاری یێن كرین، من تەبەل جوت جوت دكرین، دەقێ ژ هەمیا لاوتر یێ من بو، من (كوركانێ) سەرا پاران یا پێكری و من هەردوو بەریكێن خو ژ (دەهـ فلس و پێنج فلسان) تژی كربون، بوی دوو دەرهەمی هەمی ببونە هەڤالێن من و هەر كەسەكی حەزدكر ئەز پتر دگەل بم و پتر هەڤالێ وی بم. چیروكا من نە یا سەیرە، ژبەركو ئەوی دوو دەرهەمی چاڤێن من لبەر دنیایێ ڤەكرن، تا نوكە ژی ئەز هزرێن وی دوو دەرهەمی دكەم، هەر چنەبیت دەما ئەز قەستا بازاری دكەم، ئەو دوو دەرهەم دهێتە بیرا من، ئەز هزر دكەم ئەڤ كەسێن ل بازاری هەمی ئەون یێن ل بچویكاتیێ خەون ب دوودەرهەمێ من ڤە دیتین، سەدا سەد ئەز دزانم ئەو دوودەرهەمە نوكە یێ دبەریكا ئێكی ژ وانان دا، هەر چنەبیت ئەوی دوو دەرهەمی پێنج روژان خوە دبەریكا من دا گرتبو، بەس هین بێژن ئەڤێ نوكە دبەریكێ دا، ئەڤە چەند سالە وی دبەریكا خوە را حەشاندی و روناهی لێ كریە هزرەت، ئەوی چەند درەو و حیلە و قەهر سەرا دوودەرهەمێ من خارینە، ئەوی چەند هەڤال بخو پێ دروست كرینە و تا نوكە چەند هەڤال پێ ژ دەست داینە! دەما ئەز ڤان هزران دكەم، ئەز زوی ژ بازاری دەردكەڤم و چیروكا دوو دەرهەمی و خوشی و نەخوشیێن وی دهێلمە دناڤ وێ حەشامەتا مروڤان دا و شوكور ئەز ژ جیهانا خەونان رزگار بویم. 
%20copy.jpg)
ليست هناك تعليقات:
إرسال تعليق